பாகற்காய் கறி

உடலுக்கு சத்தான பாகற்காய், சிறுவர் முதல் பெரியவர் வரை அடிக்கடி உணவில் சேர்த்துக்கொள்வது அவசியம். நீரிழிவு நோயாளிக்களுக்கு மிகவும் நல்லது. ஒருவேளை, அதன் கசப்பு சுவை குழந்தைகளுக்கு பிடிக்காமல் இருக்கலாம். ஆனால், அதன் மகத்துவத்தை உணர வைத்து குழந்தைகளை சாப்பிட வைப்பது பெற்றோரின் கடமை. கசப்பு தன்மையை குறைக்க சிறிது சர்க்கரை வேண்டுமென்றால் சேர்த்துக் கொள்ளலாம்.

தேவையான பொருள்கள்:

பாகற்காய் – 1/2 கிலோ
புளி –  சுண்டைக்காய் அளவு
மஞ்சள் தூள் –  1 சிட்டிகை
மிளகாய்த் தூள் – 1 டீஸ்பூன்
கறி மசாலாப் பொடி – 1 டீஸ்பூன்
தேங்காய்த் துருவல் – 1/2 கப்
உப்பு - தேவையான அளவு
வெல்லம் / சர்க்கரை - சிறிது ( விரும்பினால் சேர்க்கவும் )

தாளிக்க  

எண்ணை -  1 டீஸ்பூன்

உளுத்தம் பருப்பு- 1/2 டீஸ்பூன்

கடலைப் பருப்பு - 1/2 டீஸ்பூன்

பெருங்காயம் - சிறிது

கறிவேப்பிலை - 10 

செய்முறை

பாகற்காயை  முனைகளை நீக்கிவிட்டு, மெல்லிய துண்டுகளாக நறுக்கிக் கொள்ளவும். பிஞ்சான பகுதிகளை அப்படியே சேர்த்துக் கொள்ளலாம்.

புளியை கெட்டியாகக் கரைத்துக் கொள்ளவும். வாணலியில் எண்ணை, கடுகு, உளுத்தம் பருப்பு, கடலைப் பருப்பு, பெருங்காயம், கறிவேப்பிலை தாளித்து பாகற்காயைச் சேர்க்கவும்.

உப்பு, மஞ்சள் தூள், புளிக் கரைசல் சேர்த்து வதக்கி மூடி வைக்கவும். வேகும்வரை அவ்வப்போது திறந்து கிளறிவிடவும்.

நன்கு வெந்து நீர் வற்றியதும், கறி மசாலாப் பொடி அல்லது ரசப் பொடி சேர்த்துக் கிளறி இறக்கவும். தேங்காய்த் துருவல் சேர்த்துப் பரிமாறவும்.